Nagballaag ti Cybercrime Investigation and Coordinating Center (CICC) kontra kadagiti peke a Facebook account ken social media page nga agpampammarang nga opisyal iti ahensia tapno makakiddaw ti kuarta kadagiti biktima iti online scam.
Segun ti CICC, ar-aramaten dagiti scammer ti nagan, logo ken pakabigbigan ti CICC tapno allukoyen dagiti biktima iti online fraud nga agbayad kasukat iti mapapati a tulong iti panangbawi iti napukaw a kuartada.
Kinuna ti CICC a nalaing nga aggundaway dagiti cybercriminal ken ar-aramatenda dagiti peke nga account dagiti ahensia iti gobierno tapno maala iti talek ti publiko.
Imballaagda pay nga aniaman nga account nga agpayam-ammo a CICC ken agkidkiddaw ti bayad ti processing fee, legal fee wenno aniaman a mabayadan ket maibilang nga scam.
