Maysa nga opisyal iti Catholic Bishops’ Conference of the Philippines (CBCP) iti nagkuna a saan laeng nga agyaman dagiti agpammati iti Sierra Madre nu diketdi rumbeng a salakniban manipod pannakadadaelna.
Segun ken ni CBCP-Episcopal Commission on Social Action, Justice, and Peace (ECSA-JP) vice chairman Gerardo Alminaza, rumbeng a salakniban dagiti Pilipino ti Sierra Madre kas bayad iti panangsalaknib kadagiti residente iti Luzon manipod napigsa a bagyo.
Kinunana a rumbeng laeng a ti panagyaman ket kakibinna iti responsibilidad.
Impaganetgetna a kasapulan la unay a salakniban ti Sierra Madre tapno masigurado nga agtultuloy iti kabaelanna a mangsalaknib iti pagilian manipod iti natural calamities kas iti napigsa a bagyo.
Iti agdama ket agsagsagaba ti Sierra Madre ta madaddadael gapu iti quarrying, illegal logging ken dadduma pay a makadadael a proyekto.
Ti Sierra Madre ket maysa kadagiti longest mountain iti intero a pagilian ta manipod Cagayan province agingga Quezon province iti kaatiddogna.
