Pinalubosan ti Bureau of Customs (BOC) ken ti Department of Agriculture (DA) dagiti akinkukua kadagiti bodega idiay Bulacan a nakakumpiskaranda ti P661 million a gatad ti mapapati nga smuggled rice nga ituloyda ti operasionda.
Segun iti BOC, mapalubosan nga ag-operate dagiti siam a bodega tapno masigurado ti natalged a suplay ti bagas, ngem nasken a mailawlawagda ti isayangkatda nga importation, gapu ta idi ket awan ti maipakita dagiti owner a proof of payment ti duties and taxes.
Naisayangkat ti panang-raid kadagiti bodega idi Dec. 16 idiay Bocaue ken Balagtas, Bulacan.
Karaman kadagiti nangisayangkat ti raid ket dagiti opisial manipud iti lokal a gobierno, Philippine Coast Guard, ken dagiti polis, pakairaman pay da BOC Commissioner Bienvenido Rubio ken Agriculture Secretary Francisco Tiu Laurel Jr., kasta met ti sumagmamano a kameng ti Kongreso.
249,500 a sako ti maipagarup a naipuslit a bagas ti nasarakan kadagiti bodega.
Kalpasan ti pannakisaritada kadagiti makinkukua, napalubosanda a mangituloy ti panag-operate da, ngem naingetda a mamonitor.
