VIGAN CITY – Innem ti nainayon a natay ditoy probinsia gapu ti Covid19 isu nga addan iti sangapulo ket maysa a total death cases.
Ti maikanem a natay ket ni ISC539, maysa a babai, agtawen iti siam a pulo ket dua a taga-Brgy. San Pedro, Sta. Cruz. Nayospital idi March 28 ta nagkakapsut, naguyek ken narigatan nga umanges. Pimmusay idi April 4.
Maikapito ni ISC544, maysa a lalaki, agtawen iti innem a pulo ket walo a taga-Sacang, Galimuyod. Uyek ti sintomasna. Natay idi April 7.
Maikawalo ni ISC640 a lalaki, agtawen iti uppat a pulo ket innem a taga-Paypayad, Candon City. Naguyek, naggurigor, naawanan ti panagraman ken natay idi April 8.
Maikasiam ni ISC887 a babai, agtawen iti limapulo ket dua a taga-Pantay Fatima, Vigan. Nagsakit ti bagbagina ken natay idi April 10.
Maikasangapulo ni ISC707 a babai, nagtalinaed idiay Sulvec, Narvacan. Nai-admit idi March 19 ken natay idi April 10.
Ti met maika-sangapulo ket maysa ket ni ISC588, lalaki nga agtawen iti pitopulo ket walo a taga-Catayagan, Sta. Lucia. Nagpanateng ken natay idi April 14.
Nupay kasta, nakipagladingit ni Gov. Ryan Singson iti ipupusay dagiti naCovid a biktima ken nagpalagip iti kanayon a panangsurot kadagiti standard health protocol.
Kabayatanna, duapulo ket pito ti nainayon a kaso ti Covid19 ditoy probinsia ita nga aldaw isu nga addan ti 922 a pakabuklan a kaso.
Maysa ti nairekord idiay Brgy Aluling, Cervantes; Ballaigui, Sinait; Bonifacio, Cabugao; innem idiay Candon manipud iti Brgy Ubbog, San Agustin, Patpata Primero, San Nicolas ken San Agustin; lima idiay Sugpon manipud ti Brgy Poblacion ken Danac; maysa idiay Angkileng, Sta. Lucia; pito idiay Santa manipud ti Brgy Sacuyya Norte ken Rancho.
Dua met idiay Sta. Cruz manipud ti Brgy Candalican ken Sevilla; saggaysa idiay Casilagan Norte, Banayoyo; Brgy VI, Vigan ken Dinalaoan, Narvacan.
