VIGAN CITY – Dua a bilang iti kaso a murder, multiple attempted murder ken panaglabsing ti Section 31 ti Republic Act 10591 wennu Comprehensive Firearms and Ammunitions Law iti sanguen ni Barangay Captain Joel Mailed idiay Barangay Calaba, Bangued, Abra a nangpapatay kada Elpidio Barbadillo Castillo, Jr nga agtawen ti uppat a pulo ket siyam kenni Nonilo Billedo nga agtawen ti tallo pulo ket maysa saan a napagustwan a mangiruwar ti maysa a babai nga agtrabtrabaho ti El Amor Disco Bar a kukua ni Castillo idi ala una ti agsapa idi August 27.
Segun iti pannaki-uman ti Bombo Radyo Vigan idi August 27 ken ni Abra Police Provincial Office Information Officer Marcy Grace Marron, kinagura ni Mailed ti akin kukua ti disco bar ta saan na nga inpalubos nga irwar na ti maysa kadagiti babbai nga agtatrabaho iti nasao a pasdek ket nagpangta pay nga ipaserra na ti disco bar ta awan iti permit dagiti babbai nga agtatrabaho iti nasao a pasdek.
Gapu ti dayta, nagsinnungbat ti suspek ken ni Castillo agingga a nakapungtot ti suspek ket pinaltugan na ti akin-kukua iti pasdek, pakairamanan ti kanakan na.
Nakapagpaarayat pay laeng dagiti biktima kadagiti pulis nga agpatpatrolya iti lugar iti dayta idi a kanito ngem pati dagiti pulis a nagpaarayatan dagiti biktima ket pinaltugan ti suspek isu a bimmales dagiti pulis a nakatamaan iti bukot na.
Naitaray iti ospital dagiti biktima ngem natay da kabayatan iti pannakataming da idinto a ti suspek ket natalgeden iti kasasaad na
