VIGAN CITY – Saan nga anamungan ti grupo a Bantay Bigas ti singasing ti Department of Finance a kissayan ti 20% a taripa kadagiti maang-angkat a bagas tapno mailaklaka ti presyona.
Iti pannaki-uman ti Bombo Radyo Vigan ken ni Bantay Bigas Spokesperson Cathy Estavillo, saanda a patien ti kari ni Department of Finance Sec. Ralph Recto a lumaka ti P5 ti presyo ti bagas babaen ti panangpababa ti 20% manipod 35% ta nasaysayaat laengen a siguradoen a mapadakkel ti buwis a makolekta iti gobierno para iti kasapulan dagiti umili.
Segun ken ni Estavillo, iti kinapauten ti panag-import iti pagilian ket saan pay pulos a limmaka ti presyo ti bagas ta bassit laeng ti intervention iti pagilian.
Singasingna a tapno magun-od ti nalaka a presyo ti bagas ket saan a solusyon ti panang-amyendar ti Republic Act 11203 wenno Rice Liberization Law ta rumbeng a tutokan iti gobierno ti panangpapigsa ti lokal a produksyon tapno masigurado dagiti subsidies dagiti mannalon.
Innayonna a nasaysayaat nga ipaayan ti dakkel a pondo ti National Food Authority tapno adda paggatang ti significant volume iti produksyon dagiti mannalon iti nanginngina a presyo tapno saan a malugi.
VIDEO – CATHY ESTAVILLO
