VIGAN CITY – Maisangpet inton bigat (August 17) ditoy Ilocos Sur ti bangkay ti maysa nga Overseas Filipino Worker a natay iti panagbettak idiay Beirut, Lebanon babaen iti panangtulong ti Overseas Workers Welfare Administration.
Nabigbig ti biktima a ni Perlita Guillermo Mendoza, agtawen ti tallopulo ket siam a tubo iti Isabela ngem naikamang idiay Carcarabasa, Lidlidda.
Sanen a maiyawid pay idiay Isabela ti bangkay ti biktima gapu iti COVID19 pandemic ken saanen a na-cremate.
Iti pannaki-uman ti Bombo Radyo Vigan idi kallabes iti asawa ti biktima a ni Giovanni Mendoza, nagpanawagan kadagiti maseknan nga ahensia a mayyawid ti bangkayna tapno makitada uray iti maudi laengen a gundaway.
Nupay kasta, pagyamanan dagiti kameng ti pamilia ti biktima ti insigida a panagtignay ti nasao nga ahensia.
