Agtultuloy iti panagpaagas iti ospital ti menor de edad a backride iti motorsiklo kalpasan a naidungparda iti maysa a pick-up truck iti national highway idiay Barangay Carcarabasa, Lidlidda, Ilocos Sur idi kalman, May 8, 2025.
Ti nagmaneho iti blue Keeway a motorsiklo ket agtawen iti duapulo ket maysa, addaan ti intellectual disability, awanan ti driver’s license ken ti backride na ket maysa a menor de edad ket agpadada nga agnaed idiay Barangay Poblacion Norte, Lidlidda.
Ti met nagmaneho iti nangisit a Toyota Hilux ket agtawen iti uppat apullo ket walo, naasawaan, holder iti driver’s license nga agnaed idiay Barangay Poblacion, Sta. Maria.
Iti pannaki-uman ti Bombo Radyo Vigan ken ni PLt. Rodel Marzan nga Officer-in-Charge iti Lidlidda Municipal Police Station, bayat iti panagturong ti daya a direksyon ti pick-up ket kellaat a dimteng ti nakamotor nga immagaw iti linya nga ayan ti pick-up isu a nagdinnungparda.
Kinuna ni Marzan a mapapati a gapu ti nakapoy pay a panagkita ti driver ti motorsiklo iti rason nu apay a napasamak iti aksidente bayat iti panagsikkoda iti nasao a paset iti kalsada.
Gapu iti impact ket nagsagaba iti dunor dagiti dua a nagkalugan iti motorsiklo a dagus a naipan iti Candon General Hospital, Candon City para iti pannakatamingda idinto a saan a naan-ano ti driver ti pick-up.
Nakarkaru ti sinagaba ti backride ta nadunor iti bibigna ken iti ulona a gappuanan ti pannakaidalanna iti CT-scan idinto a natalgeden ti nagmaneho iti motorsiklo.
