VIGAN CITY – Atapen ni Provincial Quarantine Officer Martel Quitoriano a dagiti tidtidda a taraon a mapapati a nalaokan ti karne nga apektado ti maatap nga African Swine Fever a naipakan kadagiti baboy idiay Rodriguez, Rizal ket isu iti nagwarasan iti nasao a virus a poon iti pannakatay dagiti adu a baboy.
Segun ken ni Quitoriano, nalukay ngamin dagiti agtrabtrabaho kadagiti port area ditoy pagilian isu a saan nga imposible nga adda latta dagiti imported a karne ti baboy ken frozen pork meats a naggapu iti sabali a pagilian nga apektado ti ASF a maiserrek ditoy pagilian.
Mainaig dayta, plano ti provincial quarantine office a temporaryo a maparitan pay laeng a maiserrek ditoy probinsiya dagiti baboy ken frozen meat tapnu maliklikan iti panagwaras iti nasao a virus.
Innayon met ni Sangguniang Panlalawigan Member Efren Rafanan a nu makita da a saan a masuplayan dagiti local hog raisers iti kasapulan a karne iti baboy ditoy probinsiya, mabalin a mapalukayan iti nasao a bilin ngem mapili latta dagiti mabalin a maiserrek a karne ti baboy ken frozen meat ditoy probinsya.
