Automatic subsidy grant kadagiti high school grad manipud iti 4Ps, maidurduron iti Senado

Nairugin a mapagpatangan iti Senado ti maysa a gakat a mamagbalin nga automatiko a qualified iti Tertiary Education Subsidy dagiti high school graduate manipud kadagiti pamilia a karaman iti Pantawid Pamilyang Pilipino Program (4Ps).

Pinasingkedan dayta ni Senador Win Gatchalian kas suporta iti panangnayon iti tulong kadagiti agkasapulan nga agad-adal agraman dagiti pamilia a sakup iti 4Ps.

Nailanad iti Senate Bill No 1894 nga amyendaranna ti Universal Access to Quality Tertiary Education Act wenno linteg para iti libre a kolehio.

Malaksid iti automatic qualification iti TES para kadagiti high school graduate manipud iti 4Ps, maiduron pay ti gakat para iti monitoring ken quality assurance iti panangipatungpal iti programa.