VIGAN CITY- Posible a saan a maawatan dagiti sumagmamano nga agpanpanday linteg dagiti naipatungpal nga ‘insertions’ iti 2019 proposed national budget isu mapagduduaan a pork barrel.
Ti exclusive interview ti Bombo Radyo Vigan ken ni Buhay Partylist Representative Lito Atienza, awan ti pork barrel iti national budget ta inikkat Ni House Speaker Gloria Macapagal Arroyo dagiti ‘insertions’ ken dagiti saan a nailawlawag nga itemized budget idi panawen ni dati a House Speaker Pantaleon Alvarez nga aggatad ti lima pulo ket maysa a bilyon a pisos.
Inlawlawag na a ti nasao a pondo ket naiyalokar kadagiti ahensyha ken developmental projects kadagiti nadumaduma a distrito tapno saan a maipan kadagiti kakadwa ni Alvarez nga adda ti bukod na nga interes.
Patien ti agpanpanday linteg a posible a saan nga usto ti report a naawat ni Senador Panfilo Lacson wenno saan na a naawatan iti proseso isu nga inpatangken na nga adda iti naisapit a pork barrel iti maisingsingasing a pondo inton umay a tawen.
