Pinasingkedan ti Office of the Ombudsman a frozen wenno naka-freeze latta dagiti assets ti amin a karaman iti kaso ti maanomalya a flood control projects.
Inlawlawag ni Assistant Ombudsman Atty. Mico F. Clavano a saan pay laeng nga iggem dagiti respondents ti kuwarta wenno assets da nga adda iti bangko.
Nupay adda expire a freeze order kontra kadagituy ket pinasingkedan ni Clavano a nakaala ti Ombudsman ti asset preservation order.
Kayat na sawen, agtalinaed latta a naka-freeze dagiti bank accounts kas panangsurot iti ‘civil forfeiture cases’ a naipila kontra kadagiti naakusaran ken maim-imbestigaran a karaman iti korapsion.
Kabayatanna, impasigurado met ni Ombudsman Jesus Boying Remulla nga agtultuloy ti imbestigasion mainaig iti maanomalya a flood control projects.
Impatangken nai Remulla ti immuna a position na a saan a mainaganan dagiti sumaruno a makasoan ngem kinarit na ti publiko nga aguray da laeng.
