VIGAN CITY – Ingunamgunam ni Gabriela Partylist Rep. Arlene Brosas a rumbeng a mailaban iti kayat ti kaaudan kadagiti umili a maibasura ti Anti Terrorism Bill ta isuda ti kangrunaan nga adda iti karbenganna ken saan a ti kaykayat ti presidente wenno kongreso ti masurot.
Iti pannaki-uman ti Bombo Radyo Vigan kenni Brosas, saan a makatulong tatta iti COVID19 a sangsangwen ti pagilian ti nasao a gakat nga ipangpangruna ti gobierno imbes a dagiti koma makatulong tapno marisut ti krisis.
Innayon ti kongresista a kasapulan nga ikonsidera ti Malakanyang ti kayat nga ilaban dagiti umili ken saan laeng nga agdesisyonda iti bukodda nga interes ta arigna isu ti wagasda tapno patalnaen dagiti mangdildillaw iti agdama nga administrasyon.
Malaskid iti dayta, patienna a ti nasao a gakat ket apekataranna dagiti ordinaryo nga umili ken panaglabsing iti karbenganda a mangiyebkas kadagiti kaririknada.
