Nagpanawagan ni Alyas Totoy wenno Julie “Dondon” Patidongan ken ni President Ferdinand Marcos Jr. a tulongan isuna a mangipaay iti hustisya kadagiti missing sabungero kalpasan iti panangibutaktakna iti pannakainaig da Charlie “Atong” Ang ken actress Gtechen Baretto iti kaso ta immunan nga impakaammona a mapapati a natayen.
Imbutakatak ni Patidongan iti interview iti GMA News nga isuna ti chief of security iti farm kadagiti pangtadi a manok ni Ang ket nabayag a nagtrabaho kenkuana ta nangrugi a bodyguard iti napalabas a sangapulo ket lima a tawen agingga nagbalin a chief security kadagiti farm.
Kinuna ni Patidongan, adda iti sinapataanna a sarita a dagiti tattao nga adda iti likodan ti pannakapukaw dagiti sabungero ket da Atong Ang, Eric dela Rosa ken Celso Salazar.
Ni Dela Rosa ket mapapati nga agmonmonitor iti pabuya ken ipakpakaammona ken ni Ang ti “tiyope” wenno naswitik ti laban wenno sabong, ket agsaritada ken ni Celso Salazar nga isu ti mangibaga nga i-hold dagiti agtitiyope.
Kinuna pay ni Patidongan nga adda dagiti polis a mapan iti lugar iti pagtadian tapno alaen dagiti biktima ket ni Ang iti mastedmind ken mangibilbilin a papatayen dagiti biktima.
Pinasingkedan ni Patidongan a ni Gretchen ti ibagbagana nga aktres nga adda pakainaiganna iti kaso.
Inlawlawag ni Patidongan a nagparang ken nagsarita isunan ta natalek a saan a mabayadan ti agdama a lider ti Philippine National Police a ni General Nicolas Deloso Torre III.
Iti baet nga inraman isuna dagiti kakaduana nga akusado iti nasao a kaso ket kinunana nga awan ti pakainaiganna iti krimen ta maysa laeng a babaonen kas farm manager.
Mapapati a dagiti kameng ni Ang iti makikamkammayet kenkuana tapno agpirma iti surat tapno ibabawina dagiti sinapataanna a sarita kasukat ti bayad a P300 million.
