Awan iti nadangran ti napasamak nga aksidente iti national highway idiay Barangay San Jose, Narvacan, Ilocos Sur a nakairamanan iti maysa nga MPV, tricycle ken kurong-kurong.
Ti nagmaneho iti Silver Toyota Innova ket babai nga agtawen iti uppat a pulo ket uppat, naasawaan, awanan iti trabaho nga agnaed idiay Barangay Cagayungan, Narvacan.
Ti nagmaneho ti traysikel ket lalaki nga agtawen iti pitopulo ket dua, naasawaan, retired PNP personnel, positibo iti alcohol breath test, nagmaneho nga awan ti valid driver’s license nga agnaed idiay Barangay Margaay, Narvacan.
Karaman pay iti nakaparking a kurong-kurong a kukua ti maysa a lalaki, agtawen iti limapulo ket maysa nga agnaed idiay Barangay Paratong, Narvacan.
Sakbay iti aksidente ket agpapaamianan a direksyon ti MPV ken uray iti tricycle ket agpapaa-amianan ngem adda iti outer lane.
Idi nadanon iti nasao a lugar kangrunaan iti sangwanan iti maysa a gas station, nagsignal ti MPV ken agsikko iti kannawan ngem saan a nakita a dagus ti driver ti traysikel isu a nagdinnungparda.
No pay kasta ket nasagid latta ti tricycle ti nakaparking a kurong-kurong iti shoulder iti national highway a gappuanan iti pannakadamage iti lugan.
No pay kasta ket awan iti nadangran ken naipan latta iti ospital dagiti karaman a driver tapno maipaay iti medical examination ken mayannatup nga evaluation.
