Natalek ni Akbayan party-list Rep. Perci Cendaña a makemmeg ni Sen. Ronald “Bato” dela Rosa uray no kasano iti kalaingan a tumaray ken aglemmeng.
Gapu dayta ket kinarit ni Cendaña dagiti otoridad kangrunaan ti Philippine National Police (PNP) ken National Bureau of Investigation (NBI) nga aramiden amin tapno makemmeg ni dela Rosa tapno saan a madadael ti talek dagiti umili kadakuada.
Kinunana a kada aldaw nga aglablabas ken nawaya ni dela Rosa ket makiskissayan ti talek dagiti umili kadagiti otoridad.
Pinasingkedanna nga awan ti rason tapno saan a maimplementar dagiti otoridad ti arrest warrant iti dati a hepe iti PNP ken nangidaulo ti Oplan Tokhang a nakatayan iti rinibo a Pilipino karamanan dagiti inosente nga ubbing.
Impaganetget ti agpampanday linteg a rumbeng a madusa dagiti nangilibas ken ni Dela Rosa isu a napukaw iti kustodiya iti Senado.
