Inallukoy ti National Electrification Administration (NEA) nga awan ti agbalin a parikot iti suplay iti kuryente kadagiti pagadalan iti panaglukat ti klase ita nga aldaw.
Segun ken ni NEA Administrator Antonio Almeda, nainget ti koordinasyon iti ahensya iti Department of Education (DepEd) ken kadagiti electric cooperative tapno masigurado iti agtultuloy a serbisyo iti kuryente kadagiti pagadalan.
Kinunana a tinawen a mangisaysayangkat ti NEA kadagiti addang iti panagsagana pakairamanan ti nainget a monitoring ken panangsigurado a naurnos ti operasyon kadagiti electric cooperative iti intero a pagilian.
Innayonna nga awan iti makitkitada a major issue iti agdama a mabalin a makaapektar iti suplay ti kuryente kadagiti pagadalan, no man pay nakarikna iti Yellow Alert idiay Visayas gapu iti patangan ti power generation.
