VIGAN CITY – Takderan iti agtawen ti sangapulo ket innem a lalaki a nailasin ken am-ammo na la unay dagiti nakalugan iti motorsiklo a mapapati a nangpalek iti teltel ti gayyem na nga agtawen iti sangapulo ket uppat kabayatan a magmagna da idiay national highway ti Barangay Marcos District, Santa idi nagbaetan ti alas dose agingga ala una y media iti parbangon idi July 7.
Segun ken ti testigo iti pasamak iti eksklusibo a pannaki-uman ti Bombo Radyo Vigan a sakbay iti pasamak ket nakita na iti motorsiklo ken dagiti nakalugan isu a positibo isuna nga isuda ti nangpalek iti teltel ti gayyem na nga ita ket comatose iti maysa a pribado nga ospital idiay Bantay.
Mainaig dayta, inkari met ni Police Lt. Jerry Arzabal, hepe ti Santa municipal police station nga aramiden da amin a kabaelan da tapnu makemmeg dagiti saan pay nainaganan a suspek nga agtawen iti sangapulo ket siyam ken dua pulo ket maysa.
Maibasar iti imbestigasyon dagiti otoridad, sakbay pay laeng iti pasamak ket kanayunen nga ibul-bully, tapis-tapisen ken ibaon-baon dagiti suspek ti biktima tunggal makita da iti computer shop.
Naamuan a apan nagbulod iti bado ken ti gayyem na ti biktima ta agsarak da kuma ken ti nobya na idi Domingo nu saan a napasamak iti insidente.
