Agruprupsan idi nasarakan ti bangkay ti maysa a lalaki iti kabaybayan wenno 15 Nautical miles manipod shoreline idiay Barangay Darapidap, Candon City nga immunan a naireport a nalmes iti Bakun River, Barangay Anaao, Alilem, Ilocos Sur.
Nabigbig ti natay a ni Mike Cabansi Lagdao, agtawen iti sangapulo ket siam nga agnaed idiay Sitio Tibunek, Barangay Anaao, Alilem, Ilocos Sur.
Nakaawat ti pakaammo dagiti kameng ti Candon City Police Station manipod Santiago Municipal Police Station a maysa a bangkay iti nakita iti maritime waters iti Santiago-Candon City isu nga insigidada met a nakikammayet iti Philippine Coast Guard-Candon ken nangisayangkat ti search and retrieval operation nga isun ti nakakitaanda ti bangkay.
Naipan ti bangkay iti igid ti baybay ket naideklarar a natay ken agruprupsan babaen ken ni Dr. Honorato Isaac Valdez iti Candon City Health Office.
Nabigbig ti bangkay babaen ti amana a ni Cesario Pasing Lagdao.
Maipalagip nga idi August 8, 2025 ket naipakaammo a ti biktima ket nalmes iti Bakun River, Barangay Anaao, Alilem.
