VIGAN CITY – Dua a construction worker ti nakemmeg idiay Barangay Poblacion Este, Sta.Cruz, Ilocos Sur gapu iti panangbastosda iti agnobio ken kadagiti pulis a nanganawa kadakuada.
Nabigbig dagiti agkasinsin a suspek a da Regie Ragudo Andaya, agtawen iti duapulo ket pito, taga-Barangay Calaoaan, Sta. Cruz, ken ni Ronald Andaya, agtawen iti duapulo ket walo, taga-Barangay Bugbuga, Sta. Cruz.
Dagiti biktima ket da Patrolman Mark Anthony Aduca, Patrolman Renzon Claveria, ken ni Patrolman Nathaniel Sumawang, agpapada a kameng ti Sta. Cruz Municipal Police Station.
Iti pannaki-uman ti Bombo Radyo Vigan ken ni Police Major Vincent Tadeo, nagreport dagiti agnobio a da Gian Mckleine Does, agtawen iti duapulo ket dua, taga-Barangay Payao Nangalisan, Laoag, Ilocos Norte ken ni Keith Anne Garcia Felipe, agtawen iti sangapulo ket walo, taga-Barangay San Andreas, Sarrat iti HIPAD duty personnel inaig kadagiti suspek a nakalugan iti motorsiklo a nagsardeng iti sangwananda ken nagisawang kadakuada iti naalas a balikas kabayatan ti panagur-urayda iti bus.
Nadakamat pay dagiti nagreklamo a dagiti suspek ket ipapakitada ti mabagbagida ken immisboda iti sangwanan dagiti biktima gapu iti nakaro a kinabartek.
Dagus a nagresponde dagiti naka-duty pulis tapno anawaen dagiti suspek ket idi masaludsod ida no ania ti mapaspasamak, insungbat ti suspek a ni Regie ti “ania ti bibiangmo, puliskayo laeng” ket kinugtaranna dagiti pulis isu a tinawagan met ni Patrolman Aduca ni Patrol Sumawang tapno ipakaammo ti pasamak.
Nakasangpet dagiti pannakabagi ti linteg ket nakemmeg pay dagiti suspek uray pay no saanda koma kayat ti agpakemmeg.
Sangwen dagiti suspek ti kaso a direct assault ken panaglabsing iti Republic Act 10586 wenno Anti-Drunk and Drugged Driving Act of 2013.
