VIGAN CITY – Adun dagiti kompanya nga agtitinnulong nga agaramid kadagiti ventilators nga usaren dagiti COVID- 19 patients ken face masks nga usaren dagiti frontline health workers idiay Amerika a kas pinasingkedan ni Bombo International Correspondent Luzviminda Resetar idiay Detroit, Michigan.
Ngem, inaklon ni Resetar nga agkurang pay laeng dagiti testing kits a mausar tapnu mapaneknekan nu ti maysa a pasyente ket positibo wennu saan ti COVID- 19 ta iti kada estado idiay Amerika ket saan met nga agpapada iti panag-peak da kadagiti COVID- 19 patients ta kas idiay Michigan ket itatta a lawas kanu iti panag-peak wennu iyaadu ti bilang dagiti COVID- 19 patients da.
Nakalukat pay laeng iti kaaduan a tiyendaan, grocery, gasoline station, bangko ken restaurant ngem take- out services laeng iti idiaya da.
Innayon na a manmanu laengen dagiti tattao a rumrumwar kadagiti pagtaengan da nangruna ta addan iti curfew hours a naipatungpal iti lugar da ket dagiti aglabsing, agmuwelta ti 1, 000 US dollars ken maibalud da ti 90 nga aldaw.
Kabayatanna, idiay met South Carolina, segun ken ni Bombo International Correspondent Frankly Julian Samson, adda pay laeng dagiti pada na a rumrumwar kadagiti pagtaengan da agsipud ta saan pay met unay nga adu ti COVID- 19 patients iti estado ti Amerika nga ayan da ken saan pay laeng a lockdown.
Malaksid idiay South Carolina, dagiti estado pay ti Amerika nga awan pay ti stay at home order wennu saan a naka-lockdown ket Iowa, Arkansas, Nebraska, North Dakota, South Dakota, Uttah, Okhaloma ken Wyoming.
Nu pay kasta, naibilin met idiay South Carolina a maiserra pay laeng dagiti non-essential business establishments ken masapul a tungpalen dagiti tattao ti social distancing tapnu maliklikan iti panagwaras ti nasao a sakit.
