Maiyuray iti deklarasyon ni Presidente Rodrigo Duterte no maikkaten wenno mapaatiddog pay ti enhanced community quarantine sakbay iti panagdesisyon ni Governor Ryan Luis Singson inaig iti sumaruno nga addang nga aramidenna iti probinsia.
Segun kenni Singson, posible a maisayangkat iti modified community quarantine kas singasing iti kaaduan nga agpanpanday linteg a naluklukay ngem iti agdama nga ECQ ta posible iti panaglukat iti probinsia ngem saan a mabalin a sumrek dagiti naggapo iti lugar nga adda ti kaso iti covid-19.
Ngem no man bilang a malukayanen iti pagannurutan ket saanen a maisubli pay iti dati a panagtignay dagiti tattao ta maobserbar latta ti social distancing ken maisayangkat latta iti checkpoint tapno mapagtalinaed a covid-19 free iti probinsia.
