VIGAN CITY – Kalikaguman ni dati a gobernador ken agdama a Narvacan Mayor Luis Chavit Singson a maipangruna ti pannakapasayaat iti probinsia nangruna iti pannakabukel kadagiti adu a pagsapulan para kadagiti umili nangruna ket adda ti mass repatriation kadagiti Overseas Filipino Workers’ idiay Middle East.
Ti pannaki-uman ti Bombo Radyo Vigan ken ni Singson, nabayagen a parikut para kadakuada iti panagawid ditoy pagilian dagiti Pilipino idiay Middle East gapu kadagiti kinaranggas a mapaspasaran da kadagiti amo da ken ti riribok iti lugar nga ayan da.
Kayat ti dati a gobernador a nu agawid dagiti OFW ditoy pagilian, nangruna dagiti taga- Ilocos Sur ken dagiti taga- Narvacan ket adda iti pagsapulan dan ket saan dan a mapanunut iti mapan makigasan-gasat idiay ballasiw taaw.
Innayon na nga adun dagiti nagawid nga OFW a natulungan na gapu kadagiti madi a kapadasanda ket inbalakad na kadakuada nga agnegosyoda laengen ditoy probinsia ta sisasagana met a tumulong ken mangipaay ti pagpuunanda.
