--Ads--

Suportaran ti Philippine National Police ti panangikagumaan ti gobierno a pagpatinggaen ti kinaranggas kontra kadagiti ubbing inton madanon ti tawen 2030.

Dayta ket kasaruno ti kari ti Department of Health iti naisayangkat a 2nd Global Ministerial Conference on Ending Violence Against Children iti Pilipinas idi Nobyembre 18.

Segun ken ni PNP Chief General Jose Melencio Nartatez Jr., ikarkari ti kapulisan a papigsaenda dagiti addang, siguradwen ti napaspas a tignay ti kada kaso a maireport, ken madusa dagiti nagbasul ta kada ubbing ket rebbengna laeng a dumakkel a natalged, addaan dignidad ken masalwadan ti karbenganna.

Impasigurado pay ni Nartatez a pabilgenda ti cybercrime monitoring ken imbestigasionda, kasta payen ti koordinasionda kadagiti kaduada nga ahensia ken digital platform tapno matiliw dagiti indibidual nga agar-aramat iti internet tapno gundawayan dagiti ubbing.  

-- ADVERTISEMENT --