Inaprobaran ti House of Representatives iti maikadua a pannakabasa ti House Bill 11579 wenno ti Graduates’ Welfare Bill, a mangiparit kadagiti pagadalan a manglapped kadagiti agturpos nga estudyante nga addaan iti outstanding financial wenno utang a makipaset iti graduation ceremony.
Inlawlawag ni House Committee on Higher Education Chairperson Jude Acidre a panggep ti gakat a mangipaay ti gundaway kadagiti estudyante nga agmartsa iti entablado iti laksid dagiti utangda iti pagadalan, ngem saanna a naikkat ti obligasionda a mangbayad kadagitoy.
Inlawlawag ni Acidre a pagtalinaeden dagiti pagadalan ti karbenganda a mangitantan iti pannakaipaulog dagiti diploma, transcripts of records ken dadduma pay a dokumento agingga a matungpal dagiti estudyante ti obligasionda.
Inikkan pay ti nasao a gakat iti bileg ti Commission on Higher Education (CHED) ken Technical Education and Skills Development Authority (TESDA) a mangted iti dusa kadagiti pagadalan a manglabsing iti nadakamat a linteg.
