Naipilan ti kaso a panaglabsing iti Republic Act 10654 section 92 a sangoen dagiti tallo a lalaki a nagaramat iti sabidong iti panagkalapda idiay Barangay Salapasap, Cabugao, Ilocos Sur.
Dagiti nakemmeg ket agtawen iti tallopulo ket walo, tallopulo ket uppat, ken duapulo ket innem, agpapada nga agnaed iti nasao nga ili.
Iti pannakiuman ti Bombo Radyo Vigan kenni PMSG Adonis Buemio, team leader ti Cabugao Maritime Law Enforcement Team, pinasingkedanna a naaramid dagiti suspek ti insidente gapu iti nabuybuyada isu nga impadas-da.
Maipalagip a naaktuan dagiti tallo a lalaki nga agar-aramatda iti Poison Vine wenno Tubli kas sabidong iti panagkalap iti ikan.
Nakumpiskar iti operasion dagiti ramut ti nasao a mula, maysa a homemade scoop net ken mapatta-patta nga uppat a kilo ti ikan nga aggatad iti P800.
