Inallukoy ni Vigan City Councilor Nestor Pajaro iti publiko a nasaysayaat nga ipakaammo mismo kadakuada wenno iti opisina -da no adda dagiti reklamo a mapasadan mainaig iti nangato a singir ti plete.
Daytoy ket kasaruno iti reklamo dagiti estudyante gapu iti nangato a singir ti maysa a tricycle drayber a nagluganan-da.
Iti pannakiuman ti Bombo Radyo Vigan kenni Pajaro, kinunana a nasaysayaat no adda dagiti ebidensia wenno pammaneknek a maala tapno nadardaras a matignayan ti problema.
Impaganetget ti opisial a masapul a maala dagiti detalye ti nagluganan-da kas iti tricycle number, plate number wenno body number tapno adda agserbi nga ebidensia no agreklamo-da.
Kabayatanna, inallukoy ni Pajaro ti publiko a liklikan ti ag-post iti social media no adda dagiti kastuy nga isyu tapno maliklikan a mairamraman amin dagiti tricycle driver nga awan met ti ar-aramidenna a madi.
