Insingasing ni Parañaque 2nd District Rep. Brian Yamsuan ti gakat a mangimandar iti PhilHealth a mangipaay iti benepisio iti panangtaripato iti salun-at ti panunot para kadagiti inna a makapadas iti parikut iti salun-at ti panunot kalpasan ti panagpasngayda.
Iti sidong ti House Bill No. 8617, masakupan ti screening, diagnosis ken panangagas iti postpartum blues, postpartum depression ken postpartum psychosis.
Segun ken ni Yamsuan, napateg ti panangipaay kadagiti inna iti umdas a suporta ken panangaywan tapno saan a mabaybay-an ti salun-at ti panunotda kalpasan ti panagpasngayda.
Nakapauneg pay iti gakat ti Department of Health (DOH) ken PhilHealth a mangisayangkat iti national campaign tapno mapalawa ti pannakaammo maipapan iti postpartum mental health ken mapabassit ti stigma ken gastos iti panangagas.
