Pinasingkedan ni Agriculture Secretary Francisco P. Tiu Laurel Jr. a pabor isuna iti gakat nga ideklarar ti State of Calamity tapno mapadaras ti maaramat dagiti pondo ken tulong ti gobierno kontra iti kumarkaro nga epekto ti El Niño.
Ited ni Laurel ti suporta iti singasing ni Sen. Francis Pangilinan gapu iti balaag ti Pagasa a posible nga agresulta iti “Super El Niño” ti mapaspasaran a napudot a panawen iti pagilian.
Masapul nga agtignay nga insigida ti gobierno ken saanen nga urayen pay a kumaro ti perdision iti agrikultura tapno maprotektaran ti pagbiagan dagiti mannalon ken suplay ti taraon.
Impaganetget met ni senador Pangilinan a dakkel ti maitulong ti nadakamat a deklarasion tapno mapadaras a mairruar dagiti kasapulan a pondo ken maipatungpal dagiti addang kadagiti apektado a rehiyon.
