Naipilan ti kaso a physical injuries ken grave threats kontra iti maysa a Barangay Kagawad a nangdaran kadagiti agina idiay Burgos, Ilocos Sur.
Dagiti biktima ket agtawen iti duapulo ket siam maysa a mangisursuro, ken ti inana nga agtawen iti pitopulo, agpada da a residente ti Barangay Bangbangar iti nadakamat nga ili.
Ti met suspek ket agtawen iti uppat a pulo ket maysa, Barangay kagawad ken residente iti nadakamat met laeng nga ili.
Iti pannakiuman ti Bombo Radyo Vigan ken ni PCPT Jumar V. Castro ti Burgos Municipal Police Station, pinasingkedan na nga adda ti daan a susik ti nagbaetan ti pamilia dagiti dua partido.
Maipalagip nga agpapatangan ti biktima a mangisursuro ti ikitna mainaig iti personal a banag, idin ta simmampitaw ti asawa ti suspek iti saritaanda.
Sipud dayta, rimsua ti nabara a patangan dagiti nasao a partido agingga inanawa pay dagituy dagiti adda iti lugar.
Kalpasanna, dimteng ti suspek ket dituy a dinangran na dagiti agina babaen ti panangdanog na kadagiti nadumaduma a paset ti bagi dagiti biktima.
Agalen ti biktima a mangisursuro ti nasakit nga ulona ken ti panaglamma ti matana, idinto a ti maysa pay a biktima ket agalenna met ti nasakit nga abagana.
