Nasurok 65,000 a mangisursuro ken school head ti na-promote iti salinong ti Expanded Career Progression (ECP) System iti gobierno manipod August 2025 agingga April 2026.
Dayta iti pinasingkedan ni Pres. Ferdinand Marcos Jr. iti panagsaritana iti oath-taking ceremony iti 2,121 a baro a na-promote a mangisursuro ken principal idiay Eastern Visayas a naisayangkat idiay Tacloban City Convention Center.
Kinablaawan ni Pres. Marcos dagiti mangisursuro ken kinunana a “well-deserve” ti promosyonda a mangpatibker iti karera iti propesyonda.
Segun ken ni Marcos, iti uneg ti adu a tawen ket simmango dagiti mangisursuro iti lapped iti karrada gapu iti pagkurangan iti posisyon ken nalawag a career path iti dati a Sistema.
Iti salinong ti ECP System, pinasingkedan ti president nga adda dua a turongen dagiti classroom teaching ken school administration.
Naaddaan payen kadagiti baro a posisyon kas ti Teacher IV agingga Teacher VII, Master Teacher V agingga VI ken School Principal V.
Malaksid kadagiti promosyon, nangirusat ti gobierno iti dadduma pay a programa para kadagiti mangisursuro pakairamanan iti panaglukat dagiti baro a teaching position, panangbukel ti non-teaching positions ken panangted ti P10,000 teaching supply allowance para iti school year 2025-2026.
