Uppat a pulo ket lima a pamilia manipud kadagiti tallo a Local Government Unit ti naidalan iti pre-emptive evacuation iti probinsia.
Dayta ket iti baet nga adda dagiti ili a naibayog iti signal no 4 gapu iti bagyo Marce.
Iti pannaki-uman ti Bombo Radyo Vigan ken ni Ilocos Sur Disaster Risk Reduction and Management Officer Rhon Arquelada, dagiti uppat a pulo ket lima a pamilia a naibakwit ket buklen iti sangagasut duapulo ket dua nga indibidwal manipud kadagiti coastal barangay.
Agtaltalinaed met a normal ti lebel dagiti karayan ken passable pay laeng dagiti amin a kalsada ken rangtay.
Adda dagiti natwang a kayo a nangsarra kadagiti kalsada ngem dagus met laeng a naikkat.
Agtultuloy ti panangmonitor ti PDRRMO kadagiti amin a lugar iti probinsia kangrunaan dagiti upland municipalities, coastal ken low-lying areas a nadaras a malayus.
Balakadna kadagiti umili nga agridam ken dagus nga agbakwit no madlawda a lalayusen wenno nadaras ti panagreggay ti daga iti lugarda.
