Impila ni Senador Loren Legarda ti tallo a gakat a gagemna a simpaen ti sistema ti value added tax iti pagilian tapno maliklikan ti dagsen a mapaspasaran dagiti Pilipino iti agtultuloy a panagngato ti presio ti produkto petrolyo gapu ti tension idiay Middle East.
Iti salinong ti Senate Bill No. 1851 wenno ti Differentiated Value-Added Tax Rates Act, bumaba ti 12 percent a mapan iti 10 percent ti kabuklan a VAT rate.
Ilong-longalong pay ti senador ti Senate Bill No. 1857 wenno Murang Bilihin at Serbisyong Medikal Act, a mangted ti VAT exemption kadagiti over-the-counter nga agas, de-lata, tinapay, sabon ken uray iti lifeline thresholds ti konsumo iti kuryente, danum, ken basic internet access.
Kabayatanna, impila pay ti opisial ti Senate Bill No. 1859 tapno lawlawagan ti panangipataw ti VAT kadagiti electricity subsidies ken statutory charges iti salinong ti Electric Power Industry Reform Act (EPIRA).
