VIGAN CITY – Kinumpirmaran ti Provincial Health Office nga adda ti maysa a babai a maibilang a ‘person under monitoring’ ti 2019 novel coronavirus ditoy probinsiya.
Ti naisayangkat a press conference idiay provincial capitol, inlawlawag ni Provincial Health Officer Dr. Carmeliza Singson a ti babai nga agtawen ti 26 ket adda kakabagyan na a naggapu idiay Hong Kong ket simmangpet da laeng idi January 29 ditoy pagilian.
Idi February 6, naggurigor ti pasyente ket narigatan pay nga aganges ken agkakapsot isu a naipan iti isolation room ti Ilocos Sur Provincial Hospital- Gabriela Silang.
Uray nu awan iti pagilasinan iti nasao a sakit dagiti kabbalay ti pasyente, inbalakad ni Dra. Singson nga ag-self quarantine da iti uneg ti sangapulo ket uppat nga aldaw.
Pinunas ti doktor iti panagdanag iti kaaduan agsipud ta ti pasyente ket under monitoring laeng ngem inkabil da iti isolation room tapnu naan-anay a maobserbaran iti kasasaad na.
