Inlawlawag ti driver ti trailer truck a naidungpar iti kayo iti acacia iti national highway idiay Sitio Kakaldingan, Barangay Lungog, Narvacan, Ilocos Sur idi kalman a saanna a nakontrol ti manibela iti lugan isu a napasamak iti aksidente.
Ti driver ti 22-wheeler truck ket agtawen ti uppat a pulo ket uppat, naasawaan ken agnaed idiay Barangay Tabiog, Bucay, Abra.
Iti pannaki-uman ti Bombo Radyo Vigan ken ni PLt. Reynald Ramos nga Officer-in-Charge iti Narvacan Municipal Police Station, saanen a nakakabig pay ti drive uray impadasna ta nag-lock iti manibela a gappuanan iti pannakaidungparna iti acacia.
Segun ken ni Ramos, gapu iti pasamak ket nakaro ti dadael iti sangwanan a paset ti lugan kangrunaan iti bangir a paset isu a pagyamananda nga awan iti kaduana a pahinante ta no kas bilang adda man ket amangan no isu ti nadangran.
Ti nasao a trailer truck ket nagkarga iti semento nga agturong iti amianan a direksyon ngem idi nadanonna iti nasao a lugar ket isu metten iti pannakaidungparna iti kayo.
