Natay ti maysa a lalaki a nagmaneho iti motorsiklo ta naidungpar iti nakasabatna a bus idiay Barangay Nanguneg, Narvacan, Ilocos Sur idi April 8, 2026.
Ti nagmaneho iti Yamaha NMax motorcycle ket agtawen iti uppat a pulo ket uppat, naasawaan, addaan ti driver’s license nga agnaed idiay Turod, Narvacan a nagaramat iti helmet.
Ti met nagmaneho iti Partas Bus ket lalaki nga agtawen iti uppat a pulo ket lima, naasawaa, bus driver nga agnaed idiay Barangay Cacadiran, Cabugao.
Iti pannaki-uman ti Bombo Radyo Vigan ken ni PCpt. Jumar Castro iti Narvacan Municipal Police Station, agpapabagatan a direksyon ti bus idinto nga agturong iti bangir a direksyon iti nakamotorsiklo.
Segun ken ni Castro, idi nadanonda iti nasao a lugar ket nag-overtake iti motorsiklo a rason iti pannakaidungparna iti makasabatna a bus iti bangir a linya.
Nakaru iti sinagaba a dunor ti driver a naipan iti ospital ngem natay bayat a matamtaming idinto a ti driver ti bus ket saan a naan-ano.
