Duagasut ket innem a Pillipino a biktima iti human trafficking iti nakaawid iti pagilian ita a lawas kalpasan a naisalakanda manipod kadagiti scam hub idiay Myanmar kas kinuna ti Inter-Agency Council Against Trafficking (IACAT).
Segun ken ni IACAT Chairperson ken Department of Justice (DOJ) Secretary Jesus Crispin C. Remulla, agtaltalinaed ti karida a tulongan dagiti biktima iti panagbangonda ken panagrugi manen.
Dagiti narepatriate a Pilipino ket nakasangpet idi March 25 ken ita March 26, 2025 iti Ninoy Aquino International Airport (NAIA) Terminal 1 a nakitaripnonganda iti agduduma nga ahensya iti gobierno pakairamanan ti DOJ, Department of Foreign Affairs, Bureau of Immigration (BI), Department of Migrant Workers (DMW), Department of Health (DOH), Department of Social Welfare and Development (DSWD), ken Overseas Workers Welfare Administration (OWWA).
Naipaay iti kasapulanda kas ti medical check-up, taraon, pinansyal, temporaryo a pagnaedan ken transportasyon.
Kabayatanna, isayangkat ti DOJ ti imbestigasyon tapno masigurado a madusa dagiti illegal recruiters ken balakadna kadagiti umili nga agannad kadagiti maidi-diaya a trabaho iti ballasiw-taaw tapno saan a maisagmak.
