Karit iti kaadda iti latin honor a nag-graduar kadagiti dua a topnotcher iti February 2026 Criminology Licensure Examination a nagturpos iti University of Northern Philippines (UNP) ta doble iti pressure a nariknada.
Iti pannaki-uman ti Bombo Radyo Vigan ken ni Tristan Earl Yarte a Rank 5 iti February 2026 Criminology Licensure Examination, iti baet ti parikot iti pinansyal ta ti amana laeng iti agsapsapul para iti pamiliada ket nagbalin a motibasyon kenkuana dayta tapno igaed iti agbasa ken agturpos ti panagadal kas maysa a Cum Laude.
Segun ken ni Yarte, manipod nagadal iti kolehio ket pinanunotnan a makapasa ken agtopnotcher isu nga idi nangrugin iti review ket awan iti aldaw a sinayangna ta pinokusanna a talaga.
Dakkel pay a tulong kenkuana dagiti namati iti kabaelanna ta arigna amin iti aglawlawna ket mamati a maipasana iti exam.
Balakadna kadagiti agad-adal ken dagiti ag-exam nga agtalek laeng iti Namarsua ket isuko amin Kenkuana dagiti kalikagum, ag-review a nalaing, ken isagana iti bagbagi saan laeng a physically no diketdi mentally pay.
Kabayatanna, pinasingkedan met ni Segundo Castañeda Jr. a Rank 10 iti February 2026 Criminology Licensure Examination nga awan iti sinurotna a timeline ta no ania iti kayat iti bagina ket isu ti patganna.
Segun ken ni Castañeda, uray ipilitna iti ag-review no saan a sumrek ket awan met laeng iti serbina isu nga iti ububraenna ket un-unaenna nga i-refresh iti utekna babaen iti pannagna, agbrowse iti social media wenno agay-ayam ket apaman a maalana iti riknana nga ag-review ket isunton iti panagbasana agingga iti oras a kaykayatna.
Nagbalin nga inspirasyonna iti pamiliana a nagsaksakripisyo para iti panagadalna isu nga isagutna kadakuada iti balligina nangruna iti amana a kanagnaganna ta patienna nga aniaman a dayaw a maipaayna iti naganna ket dayaw metten para iti amana.
Impaganetgetna a kararag iti kabilegan a gameng iti amin ta awan iti aniaman a sinurotna a pammati bayat iti exam no diketdi nagtalek laeng iti Namarsua ken iti kabaelanna.
