Sangapulo ket walo iti nairekord a drowning incidents iti intero a pagilian manipod April 13 agingga April 18, 2025 kas pinasingkedan ti Philippine National Police (PNP).
Segun kadagiti otoridad, ti nasao a bilang ket sangapulo ket lima iti natay.
Gapu dayta ket nagballaag ti PNP iti immadu a bilang ti drowning incidents kagiddan ti manamnama a panagturong dagiti umili iti kabaybayan ken dadduma pay a swimming destinations ita a kalgaw.
Dagiti biktima ket pakairamanan iti siam a nataengan ken siam a menor de edad.
Iti listaan ket dua a menor de edad iti nairekord iti Region 1 nga agpada a natay idinto a ti naireport idiay Region 2 ket pakairamanan iti maysa a menor de edad ken maysa a nataengan nga agpada a na-injure.
Idiay Region 3 ket uppat a nataengan iti karaman a gappuanan ti tallo a natay ken maysa a nakalasat, uppat a kaso idiay Region 4A a nakairamanan iti dua a menor de edad ken dua a nataengan nga agpapada a natay, idiay Region 4B ket maysa a menor de edad iti natay, tallo met iti fatalities idiay Region 5 a nakairamanan iti dua a menor de edad ken maysa a nataengan, ken saggaysa iti nairekord a natay idiay Region 6 ken Cordillera Administrative Region pakairamanan iti maysa nga ubing ken nataengan.
Kiddaw ni PNP Chief Police General Rommel Marbil iti publiko kangrunaan kadagiti nagannak ken guardian nga agalibtak nu maaddaanda ti water-related activities ita a summer season.
