Pormalen a nangipila iti kaso a Grave Misconduct, Graft ken Abuse of Authority ni Department of Social Welfare and Development Secretary Rex Gatchalian kontra kadagiti 14 a barangay official manipud iti 16 a barangay idiay Iloilo City.
Kasaruno dayta ti naipadamag nga anomalia iti Assistance to Individuals in Crisis Situation iti probinsia.
Segun ken ni Gatchalian, nagtaud ti pannakaipila ti kaso gapu iti naawat a reklamo manipud kadagiti 14 a complainant a benepisyaryo ti AICS.
Manipud iti 10,000 a pisos nga ayuda, ik-ikkatan dagiti karaman nga opisial ti umabot iti 8,000 agingga 9,000.
Kinuna ti DSWD nga umabot iti nasurok-kumurang 21.6 million a pisos ti naipaayda kadagiti lugar nga insayangkatanda iti rollout ti payout idi November 7, 11, ken 12.
