Naipasngay idi July 26, 2025 ni Thaddeus Daniel Pierce idiay Ohio a nagtaud iti embryo a na-freeze iti uneg iti tallopulo a tawen wenno idi pay laeng 1994, maibilang daytoy nga oldest embryo a balligi a naipasngay.
Dagiti nagannakna ket da Lindsey ken Tim Pierce a nabayagen a kayatda a maaddaan ti anak ket balligi a natungpal babaen ti embryo adoption.
Ti embryo ket orihinal a kukua da Linda Archerd, agtawen iti innem a pulo ket dua a nagaramat ti IVF idi dekada 90. Ti nabati a tallo nga embryo ket naidulin ken na-preserve iti uneg ti tallo a dekada.
Gapu dayta ket tallopulo a tawen ti nagbaetan da Thaddeus ken ti kabsatna a babai nga agpada a nagtaud iti nasao a DNA.
Ti nasao nga addang ket naisangsangayan a pakaistoryaan iti biang ti agham, pamilia ken namnama a pammaneknek iti kabaroanan a teknolohia iti reproduction.
