VIGAN CITY – Emosyonal ni Dr. Erwin Cadorna iti pormal a panagtugaw na kas maikanem a presidente ti University of Northern Philippines (UNP) idi kalman, October 10.
Ingunam-gunam ni Dr. Cadorna iti panagsarita na a masapul nga agtultuloy iti panangipaay ti UNP iti de kalidad nga edukasyon kadagiti agad-adal ken agbalin a nasirib dagiti agad-adal ken mangisursuro isu’t gapu na a kalikaguman na nga adda ti napigsa a wifi system iti uneg ti pagadalan.
Malaksid iti dayta, ar-arapaapen pay ti baro a university nga adda dagiti maipatulod a mangisursuro kadagiti pagadalan idiay Metro Manila tapnu makasursuro da kadagiti kabaroanan a wagas iti panangisuro a pakabenepisyaran met laeng dagiti agad-adal.
Kayat na pay a mapagbalin nga automated iti sistema ti enrollment agingga graduation agsipud ta nakita na iti rigat dagiti agad-adal nga agpilpila idiay registrar agingga ti cashier nu madanun ti enrollment.
Nadakamat na a saan na a maaramid a buk-bukod na laeng dagiti arapaap ken plano na para ti UNP isu’t gapu na a kasapulan na iti suporta manipud kadagiti mangisursuro, agad-adal agingga kadagiti non-teaching personnel ken dadduma pay a stakeholders iti pagadalan.
