Nasalamaan ti maysa a van truck a nagkarga iti 723 a kilo iti marinated chicken products nga aggatad iti P140,563 iti national highway idiay Barangay Bio Tagudin, Ilocos Sur idi kalman, June 24, 2025.
Iti pannaki-uman ti Bombo Radyo Vigan ken ni PMaj. Kleyvan Paycao Dalang manipod Tagudin Municipal Police Station, ti nagmaneho ti Elf Reefer Van Truck ket ni Sherwin Ramos Cachero, agtawen iti uppat a pulo ket dua, baro nga agnaed idiay Macayug, San Jacinto, Pangasinan ken Alberto Biagtan Martinez Jr., agtawen iti uppat a pulo ket dua, baro, helper nga agnaed idiay Barangay Malabago, Mangaldan, Pangasinan.
Segun ken ni Dalang, nagreport kadakuada ti maysa a Project Staff iti Provincial Veterinary Office iti panaglabsing dagiti dua iti falsification of documents iti salinong ti Provincial Ordinance No. 15-06 series of 2015 wenno Animal Quarantine Ordinance.
Kinunana a ti dokumento nga imparang dagiti dua ket saan a kapada iti husto a kilo ti marinated chicken products a kargada a mangipasimudaag iti panangulbodda iti dokumento.
Gapu dayta ket naipan dagiti naglabsing pakairamanan ti lugan ken naala kadakuada iti Tagudin Animal Quarantine Office ngem naiturn over-da iti Provincial Veterinary Office tapno dumalan iti husto a proseso.
VIDEO – PMAJ. KLEYVAN PAYCAO DALANG
