P88,000 iti gatad ti tinakaw ti maysa a mapapati a menor de edad iti pagtaengan dagiti agasawa idiay Barangay Macatcatud, Magsingal, Ilocos Sur idi kalman, April 1, 2026.
Ti biktima ket agasawa nga agnaed iti nasao a lugar idinto a ti suspek ket maysa a mapapati a menor de edad nga agnaed idiay Barangay Guimod Sur, San Juan.
Iti pannaki-uman ti Bombo Radyo Vigan ken ni PCPT. Melvin Trinidad iti Magsingal Municipal Police Station, pimmanaw iti babai a biktima iti pagtaenganda a napan naki-general assembly meeting it Suyo Multi-Purpose Cooperative ngem idi nagawid ket naduktalanna a napukawen iti P88,000 a nayon iti urnongda iti asawana a naipan iti cabinet iti uneg iti pagtaenganda.
Segun ken ni Trinidad, P180,000 iti urnong dagiti agasawa ngem ti mapukpukaw ket P80,000 ta mapapati a nangibati latta ti suspek tapno saan koma a madlaw dagiti agasawa a napukawanda ngem naammoanda met.
Ti nasao a gatad iti kuarta ket inurnong dagiti agasawa a pagpasimpa koma iti pagtaenganda ngem saanda a ninamnama a takawen ti nasao a mapapati a menor de edad.
Naammoan a ti suspek ket mapan makigatgatod iti tabako iti nasao a lugar isu a posible a nakitana iti panangidulin ti babai a biktima ti kuarta iti cabinet isu nga idi pimmanaw ket isun ti panangalana.
Agtultuloy iti panangsapul dagiti otoridad ti nasao a suspek ta agingga ita ket saan pay a nasapulan.
