Kaso a panaglabsing ti Presidential Decree 1602 wenno ti illegal gambling ti sangwen dagiti uppat a nagsusugal idiay Brgy. Codoog, Narvacan.
Nabigbig dagiti suspek a da Cristobal Cansino, agtawen ti innem a pulo ket tallo; Grace Cardenas, agtawen ti uppat a pulo ket uppat; Sally Cabañero, agtawen ti limapulo ket dua ken ni Herminia Cabang, agtawen ti pitopulo nga agpapada nga agnaed iti nasao a lugar.
Segun ken ni Police Captain Arcadio Viloria, hepe ti Narvacan Municipal Police Station, napanda iti nasao a barangay idi makaawatda ti tawag nga adda iti agsusugal ket idi nakasangpetda, naduktalan dagiti suspek nga agaayam ti mahjong iti ruar ti pagtaengan ni Allan Cabudol.
Naala kadakuada ti maysa a mahjong set, uppat a tugaw, maysa a lamisaan ken pusta nga aggatad ti sangagasut limapulo ket walo a pisos.
