Umabot iti dua a bulan a namonitor iti illegal nga aramid ti maysa a technician sakbay a nakemmeg iti naisayangkat a buy-bust operation idiay Barangay Gabur Sur, Sta. Cruz, Ilocos Sur.
Ti suspek ket lalaki nga agtawen iti limapulo ket tallo, naasawaan nga agnaed iti nasao nga ili.
Iti pannaki-uman ti Bombo Radyo Vigan ken ni PMaj. Paul Vinsent Tadeo iti Sta. Cruz Municipal Police Station, ti suspek ket newly identified laeng ngem natunton gapu kadagiti napalabas a nakemmeg maipanggep iti illegal a droga idi kallabes.
Segun ken ni Tadeo, ti area of operation ti suspek ket iti ili ti Sta. Cruz ken ili ti Tagudin.
Maipalagip a nakemmeg ti suspek ken naalaan iti drug evidence a 2.74 a gramo iti maatap a shabu nga aggatad iti P18,632 a naipan iti innem a heat-sealed transparent plastic sachets a nagserbi a buy-bust item ken possession.
Kasta pay a naala kenkuana iti non-drug evidence a maysa a unit iti android phone; maysa a genuine P1,000; maysa a genuine P500; ken Honda Wave nga adda sidecar-na.
Iti agdama, kinuna ni Tadeo a maisagsaganan ti kaso a maipila kontra ti suspek a nakakustodiya iti Sta. Cruz PNP.
