Naituding pay laeng ti panagpapatang dagiti karaman iti panagdinnungpar ti maysa a pick up ken motorsiklo iti national highway idiay Barangay Suso, Sta. Maria, Ilocos Sur.
Ti nagmaneho ti Gray Yamaha NMax ket ni John Philip Recolcolin, agtawen iti duapulo ket innem, baro, security guard, holder iti driver’s license nga agnaed idiay Barangay San Pedro, Narvacan.
Ti met nagmaneho ti Black Toyota Hi Lux ket ni Jumar Cariaga Fernandez, agtawen iti uppat a pulo ket maysa, mangisursuro, holder iti driver’s license nga agnaed idiay Brgy. Lanao, Bangui, Ilocos Norte.
Iti pannaki-uman ti Bombo Radyo Vigan ken ni Police Major Macario Dulawan Jr., agpapadaya ti motorsiklo idinto nga nga adda iti bangir a direksyon ti pick-up idin ta immagaw ti linya ti nagmotorsiklo iti ayan ti pick up a gappuanan ti pagdinnungparda.
Naipurwak ti nagmotorsiklo ken naipasirok ti luganna iti pick up. Nagsagaba ti nakamotor iti fracture iti sakana ken nadunor iti nadumaduma a paset iti bagina idinto a saan a naan-ano ti nagmaneho ti pick-up ngem agpadada a naipan iti Ilocos Sur District Hospital – Narvacan babaen kadagiti nagresponde nga MDRRMO – Sta. Maria.
