Pinaglibakan ti suspek ti robbery holdup nga inaramidna iti nasao nga insidente iti Rizalondo Residence idiay Barangay Tamag, Vigan City, Ilocos Sur idi June 8, 2026.
Ti suspek ket lalaki nga agtawen iti uppat a pulo ket innem, tricycle driver, taga-Bulag Centro, Bantay, ngem agnanaed iti Barangay Capangpangan, Vigan City, datin nga adda rekordna iti kapulisan.
Ti met biktima ket agtawen iti tallopulo ket dua, agnaed iti Tamag, Vigan City.
Iti pannaki-uman ti Bombo Radyo Vigan ti suspek, nakigtot laengen ta bayat ti panagtakderna iti abay ti luganna ket immasideg dagiti polis ket inayabanda a mapan iti PNP Station ket idi impakitada isuna iti biktima ket kinumpirmaran ti biktima nga isu ti nangaramid iti insidente.
Segun ti suspek, saan pulos a napan isuna idiay Tamag a nagpasada ta iti laeng Poblacion area iti nagpasadaanna.
Kiddawna iti pannaka-adal nga umuna dagiti CCTV footage iti lugar a nakapasamakan iti insidente sakbay a pabasolenda isuna ta aminado nga iti baet nga adda dati a rekordna a theft iti kapulisan ket saanen nga agar-aramid pay iti maikaniwas.
