Desidido ti pamilia ti tricycle driver a binagkong ti padana a tricycle driver idiay V. Delos Reyes Street, Vigan City a mangituloy iti kaso.
Iti pannaki-uman ti Bombo Radyo Vigan ken ni Rizelle Joy Galace, putot ti biktima, kayatda a maikkan ti hustisia ti pannakatay ti amada.
Kinontra ti putot ti biktima dagiti naibaga ti suspek nga ibul-bully isuna ti amada ta patienda a nasingpet a tao.
Innayon ni Galace nga ad-adda pay a ti amada ti napunwan iti suspek ta kunana a ti kinapudno ket ti amada ti manglikliklik iti suspek.
Ammoda nga adda daan a susik ti amana ken ti suspek ta idi kallabes ket naimatanganda pay ti dandani a panangdungpar ti suspek iti amada a nakaubba iti apona.
Kabayatanna, murder ti kaso a sangwen ti suspek gapu iti namin-adu a daras a panangbagkongna iti biktima a puon ti nakatayanna.
