Kaso a murder ken panaglabsing iti Republic Act 10591 wenno Comprehensive Firearms and Ammunition Regulation Act ti sangwen ti maysa a mannalon kalpasan a pinaltoganna ti padana a mannalon idiay Barangay Lintic, Banayoyo, Ilocos Sur idi June 17, 2026.
Ti suspek ket agtawen iti uppat a pulo ket uppat, naasawaan, mannalon nga agnaed iti nasao a lugar idinto a ti biktima ket agtawen iti innem a pulo nga agnaed idiay Barangay Casilagan, Banayoyo.
Iti pannaki-uman ti Bombo Radyo Vigan ken ni PCpt. Medward Galay nga acting chief of police iti Banayoyo Municipal Police Station, mapapati a siningir ti biktima ti suspek iti ab-abanganna a daga a pagmulmulaanna ket gapu ta saan a makabayad ket mapapati a nadissoan daytoy ti biktima ken pinangtaanna iti biagna isu a naaramid ti suspek iti krimen.
Segun ken ni Galay, inkalintegan ti suspek a kinabil isuna ti biktima babaen ti panangkugtar ken panangsipat isu a saan a nagdudua a nangpapatay ti biktima.
Maipalagip nga immunan a naipadamag a nasarakan nga awanen ti biag ti biktima a nakaindayon nga adda tama ti bala iti paltog ti ulona ket iti imbestigasyon, inamin ti simmuko a suspek a naaramidna iti krimen babaen ti panagusarna iti Norinco .45 calber pistol.
